Энержи Ресурс ХХК нь 2005 онд байгуулагдсан үндэсний уул уурхайн компани бөгөөд монгол нүүрсний үнэ цэнийг нэмэгдүүлж, сайн чанарын нүүрс, нүүрсэн бүтээгдэхүүнээр дэлхийн зах зээлд өрсөлдөн, Монгол Улсын үйлдвэржилт, нийгэм, эдийн засгийн хөгжилд хувь нэмэр оруулах зорилготойгоор үйл ажиллагаа явуулж байна.
Тус компани нь Өмнөговь аймгийн Цогтцэций сумын нутаг дахь Ухаа Худаг коксжих нүүрсний ордод үйл ажиллагаа явуулдаг бөгөөд 2,962 га талбай бүхий, 11952А ашиглалтын тусгай зөвшөөрөл эзэмшдэг. Ухаа Худаг уурхайн үйл ажиллагаа 2009 онд эхэлсэн бөгөөд өнөөдрийн байдлаар хүчин чадал болон үйл ажиллагааны цар хүрээгээр Монголын нүүрсний салбарт тэргүүлэгч уурхай болж чадсан. "Монгол”-оор овоглосон тэргүүлэгч зэргийн коксжих нүүрсний брэндийг бий болгож, бүс нутгийн төдийгүй дэлхийн зах зээлд таниулах зорилтын хүрээнд компани үйл ажиллагааныхаа үе шат бүхэнд олон улсын стандартыг мөрдлөг болгодог. Тэрчлэн уул уурхайн салбарын дотоодын болон олон улсын зах зээлийн шилдэг туршлага дээр үндэслэсэн нь Ухаа Худаг төслийг богино хугацаанд дэлхийн жишигт нийцсэн уурхай болоход томоохон түлхэц үзүүлсэн.
Энержи Ресурс компанийг М-Си-Эс групп, Петровис ХХК, Шунхлай групп зэрэг дотоодын зах зээлд танигдсан, үндэсний хэмжээний томоохон компаниудын хамтын хөрөнгө оруулалттайгаар байгуулсан. 2010 оны 10-р сард тус компани Хонконгийн хөрөнгийн биржид бүртгүүлж, Монголын компаниудаас анх удаа олон улсын хөрөнгийн зах зээлд амжилттай хөл тавьсан.
Уурхайн үндсэн үйл ажиллагаа болох нүүрс олборлолт, хөрс хуулалт болон мэргэжлийн ажилчдын сургалт, дадлагажуулалт зэрэг чиглэлүүдэд Энержи Ресурс компани Австралийн дэлхийд алдартай Лейтон Ази компанийг гүйцэтгэгчээр ажиллуулдаг бол Нүүрс баяжуулах үйлдвэрийг шинээр барьж байгуулах ажилд боловсруулах үйлдвэрлэлийн технологи, дизайн болон менежментийн чиглэлд дэлхийд тэргүүлэгч, Австралийн Сежмен компанитай хамтарсан. 2009 оноос хойшхи харьцангуй богино хугацаанд Ухаа Худаг уурхай нь Нүүрс баяжуулах үйлдвэр, 18 мегаваттын цахилгаан станц, усан хангамжийн систем, орон сууцны хороолол гээд техникийн болон нийгмийн дэд бүтцүүдтэй, аж үйлдвэрийн томоохон цогцолбор болон өргөжсөн. 2013 оны эцсийн байдлаар Энержи Ресурс компанийн үндсэн ажиллагсдын тоо 2,200 гаруйд хүрсэн төдийгүй Ухаа Худаг цогцолборын хүрээнд 4,000 орчим хүн шууд ажлын байраар хангагдаж байна.
