-Дуулиант гэмт хэрэг-

Цуврал-1

1956 оны 7 дугаар сарын 8-ны үүрээр Тель-Авиваас Бейрутыг зорьсон ачааны машинаар Израилийн армийн хоёр офицер Жанжин штабын даргынхаа тушаалыг биелүүлэхээр хөдөлжээ. Тэд хилийн бүсэд ачаа хүргэх даалгавартай байлаа. Машины тэвшин дээрх төмөр хайрцгуудад цэргийн холбооны чухал хэрэгслүүд байгаа гэсэн ойлголттой л явжээ. Жанжин штабын даргын тушаалд ч холбооны шинэ хэрэгслийг хилийн бүс дэх цэргийн ангиудад хуваарилахыг 5 дугаар армийн командлагч Ирвэн Рошед даалгасан байв.

Гэхдээ тэрхүү тушаалд "Тель-Авиваас Бейрутын чиглэлд” гэсэн үг орсон нь илүүц, хэн нэгний алдаанаас болоод ташаарсан маршрут мэт байсныг өнөөх хоёр офицер ер мэдээгүй ажээ. Лацтай тушаалыг тэд задлаагүй тул энэхүү ачааг дагалдуулан харуул хамгаалалт томилоогүйн учрыг ч гадарласангүй.

Үүрээр хөдөлсөн машин өдөр 11 цагийн үед хилийн бүсийн эхний пост дээр иржээ.

-Ноён хошууч аа, бичиг баримтаа!

-Тээшийг шалгах шаардлагагүй. Жанжин штабын даргын тушаалтай яваа гээд лацтай дугтуйг сарвайхад шалган нэвтрүүлэхийн офицер "Жанжин штаб” гэсэн том хүрэн лацыг нь хараад бүхээгт суугаа офицеруудын бичиг баримтыг шалгалгүй шууд ёслоод нэвтрүүлсэн байна. Ингэхдээ хошуучийн дэргэд суусан дэслэгч нь сахал үсэндээ баригдсан, нэг л этгээд санагдсан ч "Жолооны ард дэслэгч суусныг харахад үнэхээр онцгой ачаа юм шиг байна. Лав консерв биш дэг ээ” хэмээн шалган нэвтрүүлэхийн офицер хажуудаа зогссон түрүүчид шивнэн хоцорчээ.

Энэ цаг мөчөөс хойш уг ачааны машинтай хоёр офицерийг харсан хүн нэг ч үгүй. 16 төмөр хайрцгийн 6-д нь 1.2 тонн алт хийж ачсан уг машин усны уур манан адил замхарч орхижээ. Дараагийн пост хүртэлх 20 км замын хаанаас нь ч хайгаад нэмэр болсонгүй. Цэргийн цагдаагийн бүлгийн 30 гаруй хүнтэй тусгай хэсэг бүтэн сар гаруй эрэл хайгуул хийгээд ямар нэг ул мөр илрүүлж чадаагүй ажээ.

Алт ачсан ачааны машин алга болсон энэ бүсэд ердөө хоёрхон замтай, 40 км-ын тойрогт цэргийн 8 пост ажиллаж байсан бөгөөд тэр машин агаарт нисчихдэггүй л юм бол алга болох үндэслэлгүй байв.   Тухайн үеийн Жанжин штабын оперативын мэдээнд "Холбооны станцуудын хуурай тэжээл ачсан RGL 6064 дугаартай автомашин Жанжин штабын холбооны хэлтсийн ахлах офицер М.Конне, офицер Т.Роутын хамт сураггүй болсон. Эрлийн группыг хурандаа С.Даянаар ахлуулан томилов” гэснээс өөр юу ч үлдсэнгүй.

1967 онд Араб-Израилийн дайн ид өрнөж байхад эрлийн группыг ахалж байсан хурандаа Сатес Даян танкийн бригадын командын байранд ар шилэндээ буудуулан учир битүүлгээр амь үрэгджээ. Түүний хэрэг дайны үеийн үй түмэн үхэл сүйрэлтэй хамт ор сураггүй замхарч болох байсан ч фронтын сонины нэгэн мэдээ гай болж "Танкийн 16 дугаар бригадын командлагч хурандаа Даян жинхэнэ цэрэг эрийн ёсоор тулалдааны талбарт амь үрэгдлээ” гэсэн байв. Ингээд энэхүү ганц өгүүлбэр нь өнөөх 1.2 тонн алтны хэргийг дахин мөрдөх эхлэл болжээ.

1969 оны хавар бэлтгэл ахмад П.Радовский Израилийн цэргийн тагнуулын албан дээр фронтын мөнөөх сонины дугаарыг барьсаар хүрч ирсэн байна.

Даян хурандаа бол үнэнч шударга дарга байсан. Харин үхлийн шалтгаан нь энд бичсэнээс өөр юм. Тэр өдөр блиндажийн ойролцоо их бууны хоёр сум дэлбэрсэн. Намайг блиндаж руу гүйж ороход Даян хурандаа холбоочныхоо хамт хоёул түрүүлгээ харан унасан байлаа. Тэд яг ар шил рүүгээр гар буугаар буудуулсан шархтай байсныг би хоёр нүдээрээ харсан. Би Даян хурандааг эргүүлж дээш харуулахаар тонгойтол толгой дээр минь нэг хүнд юм унах шиг болоод би эрэмдэг зэрэмдэг болсон нь энэ. Миний ард хэн байсныг харж чадаагүй. Ямарч байсан Даян хурандааг холбоочинтой нь хамт цааш харуулсан хүн тэр мөн” гэсэн байна.

Энэ мэдүүлгийн мөрөөр эрэн сурвалжлах явцад Даян хурандаагийн эхнэртээ бичсэн захидал олджээ. Тэрхүү захидалд "Өнөөх алтны гай одоо ч намайг дагалдсаар байна. Гурав дахь үхдэл нь би л болж таарах байх. Боломж гарвал тэд намайг цааш харуулж орхино” гэсэн байлаа. Харамсалтай нь захиаг хүлээн авах ёстой эхнэр нь Даянаас долоо хоногийн өмнө гэнэт өвчнөөр өөд болсон учир захиаг түүний эгч авч хадгалсан бөгөөд задалж ч үзээгүй байжээ.

Ар шил рүүгээ буудуулсан хурандаа, гэнэт нас барсан эхнэр, Араб-Израилийн дайнаас хоёр жилийн өмнө буюу 1965 онд амиа хорлосон Жанжин штабын дарга, алттай ачааны машинтай ор сураггүй алга болсон хоёр офицер гээд учир битүүлэг хэргийн үзүүрээс атгасан тагнуулынхан 8 сар гаруй мөрдөн шалгасны эцэст RGL 6064 дугаартай армийн машинд тус бүрдээ 200 кг алтан гулдмай бүхий 6 хайрцаг ачин Тель-Авиваас гарч явсан болохыг тогтооосон байна. Ерөнхий сайдын нууц захирамжаар эдгээр 6 хайрцаг алтыг анх Жанжин штабын байранд хүргэж өгсөн Израилийн төв банкны дарга асан М.Сочен 1970 оны 2 дугаар сарын 29-нд гэрийнхээ гадаа бас л гэнэт нас баржээ. Бүрэнхийд дэргэдүүр нь өнгөрч явсан нэгэн хүн хортой 2.5 мм-ийн ган зүүг хөлийнх нь булчинд зоосон байлаа. Тэр этгээд чухам хэн байв, түүний ард өөр ямар хүмүүс аллагын хор найруулж суув. Энэ бүхэн сураг ажиггүй хэвээр. Хамгийн гол нь 1.2 тонн алт хаачсан нь одоо болтол нууцлагдсаар байна.

Орчуулсан Б.Чинбат

Жич: Энэхүү нийтлэлийг хуулбарлахыг хориглоно. Харин цахим сүлжээнд линкээр холбож болно.

Эх сурвалж: manaiklub.com