Монголын эдийн засгийн форумын нэг том зорилго бол гадны хөрөнгө оруулалтыг татах явдал. Гадны хөрөнгө оруулагчдад өндөр ач холбогдол өгч тэдэнд эерэг мессеж хүргэхийг чухалчилдаг.

Гэтэл эрх баригч Ардчилсан намын УИХ дахь бүлгийн дарга Д.Эрдэнэбат Монголд хөрөнгө оруулсан хамгийн том хөрөнгө оруулагчаа гутаан, басамжлан байж өөрсдийгөө дөвийлгөсөн жишээ хэлсэн нь олны дургүйцлийг хүргэж байна. Эрх баригчдын салан назгай хариуцлаггүй байдал биеэ өмөөрч, өмнөхөө үгүйсгэдэг ааш араншинд Монголчууд бараг дасал болсон. Гэтэл тэд Монгол Улсыг зориуд санаатайгаар хорлоод байна уу гэлтэй үг үйлдлийг үзүүлээд эхэллээ. АН-ын бүлгийн дарга Д.Эрдэнэбат "Ямар ч хөрөнгөгүй, ямар ч баялаггүй компани орж ирээд дэлхийн зах зээл дээрээс хэдэн тэр бумаар нь мөнгө босгож байхад... бид зээл авах эрхээ хасуулж болохгүй” гэж хэлсэн нь гадны хөрөнгө оруулагчдын нүдийг орой дээр нь гаргажээ. Түүний байр суурийг хэн ч хаанаас нь ч тайлбарласан АН-ын байр суурь гэж ойлгоно. АН-ын байр суурь бол өнөөдрийн Монгол Улсын байр суурь. Гэтэл Монгол Улс хэдхэн жилийн өмнө Оюутолгойн орд газраа хамтарч ашиглана гэж харилцан тохиролцож гэрээ байгуулсан хамгийн том хөрөнгө оруулагчаа хөрөнгөгүй, баялаггүй гэж тодорхойлж байгаа нь Манай улсаас дэлхийн хөрөнгийн зах зээлд хүргэж буй мессеж болж байна.

Хүн өөрийгөө дөвийлгөж болно. Гэхдээ заавал бусдыг хомрогонд нь басамжлан, харьцуулах ямар ч шаардлага байхгүй. Тэр дундаа Монгол Улсын эдийн засагт голлох жин дарах болсон Оюутолгойн хөрөнгөоруулагчаа ийнхүү хэлж байгаа нь ёс суртахууны хувьд тун бүдүүлэг үйлдэл билээ. Д.Эрдэнэбатын энэ үг гадныханы гайхшралыг бараад ч зогсохгүй Оюутолгойн гацаанд орсон гэрээ хэлцлийг тодорхойгүй байдалд хөтлөх ч аюултай гэдгийг мань хүн тооцоолоогүй бололтой.

Рио Тинто компани бидэнд буу тулгаж байгаад гэрээх ийгээгүй. Ард түмний чөлөөт сонголтоор байгуулагдсан төр засаг, түүний төлөөлөлтэй олон улсад дагаж мөрдөгддөг хууль дүрэм, стандартын дагуу бизнесийн ашиг олох үүднээс тохиролцож гэрээ байгуулсан. Муу муухай гэж хэлэх хэрэгтэй бол бид сонгож байгуулсан төр засагтаа гомдохоос ашиг олох гэж ирсэн тэднийг ад үзээд байх нь зүйд үл нийцнэ.

Үүнийгээ байг гэхэд Монголчууд хамгийн том хөрөнгө оруулагчаа хөрөнгөгүй, баялаггүй гэж хэлээд өөрсдөө олон улсын зах зээлээс мөнгө босгоно гэвэл түүн шиг худлаа зүйл байхгүй. Рио Тинто компаний түүх, туршлага бол Канад улсын нэгэн нэрийн хуудас. Тэд хөрөнгө оруулагчдын итгэлийг зүв зүгээр Д.Эрдэнэбат шиг "бурж” суугаад олж аваагүй. Олон арван төсөл, үйлдвэрлэл амаргүй хүнд сорилтын дараа хөрөнгө оруулагчдын итгэл, үнэлэмж тогтдог. "Нааш ир” гэж гэртээ оруулчихаад учиргүй агсамнаж, зодоод хөөгөөд явуулчихдаг бидний араншингаас шал өөр асуудал. Найзаа муулж, өөрийгөө дөвийлгөж яваа хүнтэй ямар олигтой нь нөхөрлөх билээ. Тийм л зарчим дэлхийн зах зээл дээр үйлчилж байхад Д.Эрдэнэбат Монгол Улсаа хөгжүүлэх хөрөнгө босгох битгийхэл харин ч хөөж, туух бүдүүлэг үгийг унагалаа.

Хотын дарга улсын баатар маань "Хятадын коммунист намынхан алуурчид” гэж хэлээд өмнөд хөршийнхнийгөө багагүй гомдоосон. Хэдийгээр уучлал гуйж байдлыг аргадсан ч тэд АН-д алуурчид шиг харагддаг гэдгээ мэдэж авсан. Муулуулан байж сайн нөхөр явах хэрэг хэнд ч байхгүй. Ийм хүйтэн цаг агаар дээр  Ерөнхийсайд Н.Алтанхуяг "Чалко манай нүүрсийг 70 доллараар аваад байна” гэж чамлаад  30 долларын гэрээ байгуулж дордуулан "гавьяа” байгуулсан. Харин одоо УИХ дахь бүлгийн дарга нь хамгийн том хөрөнгө оруулагчаа гутаан байж өөрсдийнхөө тэнгэр гаралтай онцгой үндэстэн болохоо баталсан мэдэгдэл хийлээ. Энэ бүхнээс харахад Монголыг хөгжүүлэхгүй байх, Монголыг муухай харагдуулах, Монголыг ганцаардуулах бодлогыг зориуд санаатайгаар явуулаад байгаа юм бишүү? гэж аргагүй эрхэнд бодоход хүргэж байна.

Т.Цагариг