Эрхэлсэн бизнесээрээ олноо нэрлэгдсэн эрхмүүдийн нэг бол Буян Б.Жаргалсайхан. Түүнийг шулуун шударга яриатай, үзэл бодлоо хэнээс ч айж эмээлгүй хэлдэг, хөдөлмөрч бизнесмэн гэж олон нийт үнэлдэг.

Монголын анхны саятан Б.Жаргалсайхан багын бизнес сэтгэлгээтэй нэгэн байсан бөгөөд хямд даавуугаар хувцас хийж худалддаг байж. Ноён Базарсадын Жаргалсайханы хувьд Эрхүү хотын их сургуульд сансрын физикч мэргэжил эзэмшсэн бөгөөд тухайн үеийн оюутнуудын нэгэн адил тарваганы арьс, туулайн малгай, нэхий дээл зардаг нэлээд бийлэгжүү оюутан байсан аж. Орост улаан хамба хилэн нэлээд үнэд орох үед тэрээр өөр өнгийн хамба хилэнг Хятадаас авч будганд оруулаад түүгээрээ хувцас урлаж худалдсан нь нэлээд ашигтай байжээ. Энэ тухайгаа "Би наймаа хийж байхдаа монголчуудаа бага, гадныхныг их шулсан. Хятадаас 10 төгрөгийн бараа аваад Орост 1000 төгрөөг зарах жишээтэй. Хитачи видео камерыг Сингапураас 2000 доллароор аваад Хятадад 4000 доллароор зарж явлаа” хэмээн дурсан ярьсан нь бий.

Ноён Б.Жаргалсайхан 1984 онд сургуулиа төгсөөд Говь комбинатад туслах ажилтнаар ажлынхаа гарааг эхэлсэн ч төд удалгүй ажлаасаа гарч хоёр Германы хооронд арилжаа наймаа эрхэлжээ. Тухайн үед хамгийн том хувийн өмчтөн байсан Б.Жаргалсайхан ах дүүсийнхээ хамт 20 мянган төгрөгийн хөрөнгө оруулалттайгаар Буян нэртэй оёдлын хамгийн анхны хоршоо байгуулсан нь 1989 он байлаа. Хоршоогоо 1992 онд компани болгожээ. Мөн тэрээр төмөр, ноолуур зэрэг түүхий эд экспортолж, Сингапураас электрон бараа импортолдог байж.

Анх найман оёдлын машинтай байгуулагдсан Буян компани өдгөө Япон, Герман, АНУ, Орос, Франц, Өмнөд Солонгос зэрэг олон оронд бүтээгдэхүүнээ экспортлож байна. Түүний үүсгэн байгуулсан Буян Холдинг компанийн захирлаар төрсөн дүү Б.Цогтсайхан нь ажилладаг.

"Мэргэжлийнхээ дагуу компани байгуулах болвол гэнэт их ашиг олно хэмээн тооцоолохын оронд хөдөлмөрөөрөө эхэл. Олсоноо хуримтлуулж үр ашигтай зүйлд зөв зарцуул. Үргэлж хөдөлмөрлө, үнэнч шударга бай. Илүү зүйлд бүү шуна” хэмээн сургамжлах ноён Б.Жаргалсайхан ноолууран бүтээгдэхүүн үйлдвэрлэхээс гадна Монголын рок попын ертөнцөд үнэтэй хувь нэмэр оруулсан нэгэн. Тэрээр 2000 оны дунд үед хамгийн чанартай техник хэрэгсэлийг оруулж ирж дэлхийд алдартай хамтлаг дуучдыг эх орондоо урьж шоу бизнесийн салбарт шинэчлэл хийж байлаа.

Ардчилсан хувьсгалын эхэн үед томоохон санхүүжүүлэгч нь явсан тэрээр Хаммер жип, шевролет, лимузин автомашиныг Монголд анх унаж байсан. Харин түүнээс "Та баян хүн мөн үү?” хэмээх сэтгүүлчийн асуултанд "Миний хувьд ядуу ч биш байх. Баян гэдэг харьцангуй ойлголт. Компаниар нь овоглодог баячууд гээд их хөөргөдөг. Бүгдээрээ хөөрхий актлаад устгагдсан, арилжааны банкиндаа нэг их өндөр хүүтэй хэдэн төгрөгийн өртэй байгаа биз дээ. Баян гэхэд хэцүү. Хийж бүтээхийн төлөө тэмцэж буй хүмүүс гэвэл үнэнд жаахан ойрхон бууж байна” гэж хариулжээ. Мөн "Монгол боссууд их олон юм руу үсчээд харсан бүх юмаа ганцаараа булааж авч хийх гээд хашгираад, хэн хог цуглуулсан нь төдий чинээ баян хүн болж харагдах гээд… Монголд газар хувьчиллаа гээд сандраад том том газар аваад хашаа хатгаад байна. Тэгэх хэрэггүй. Тэртээ тэргүй Монголын газар нутаг хангалттай. Монголд ирж бидэнтэй газар булаалдах гадаадын хүн байхгүй” гэж хэлснийг нь Монголын баячуудын нууц номонд бичсэн байдаг.