УИХ-ын 71 дүгээр тойрогт МАН-аас нэр дэвшиж буй Ц.Гарамжавын тойргийнхоо иргэдтэй хийх уулзалт үргэлжилж буй. Сонгогчидтой хийх уулзалтын үеэр иргэд тухайн хороонд  тулгамдаж буй зүйлсээ хэлж, нэн түрүүнд шийдвэрлэх ёстой асуудлуудын талаар саналаа хэлж байв. Түүнчлэн хийж бүтээсэн зүйлтэй, хөдөлмөрч, төрд гараад иргэдийн итгэлийг дааж ажиллах чадварлаг хүнийг дэмжиж байгаа гэдгээ ч иргэд илэрхийлсээр байгаа юм.

Мөн зарим иргэд Ц.Гарамжаваас уул уурхайн салбарт ажилладаг хүний хувьд яагаад заавал хууль тогтоох байгууллагад орохоор болсон талаар нь асуусан. Ц.Гарамжав хариулахдаа "Манай улс өнгөрсөн 20 гаруй жилийн турш зах зээлийн нийгэм рүү шилжихдээ бизнесээ дэмжсэн тийм ч таатай нөхцөлийг бий болгож чадсангүй. Уул уурхайн салбарынхны хувьд хууль тогтоомжийн тогтворгүй байдлаас болж маш олон удаа үйлдвэрлэл зогсох, хөрөнгө оруулалтаа төлж чадахгүй байх байдалд олон удаа орж байсан.

Би өөрийгөө залгамжлах олон сайхан инженерүүдийг бэлтгэсэн. Өөрөөр хэлбэл группийг маань аваад явах чадвартай удирдлагууд үүссэн. Тийм учраас би улсын их хуралд очиж уул уурхай, үйлдвэрлэл, аж үйлдвэрийн салбарын хууль тогтоомж болон бусад жижиг дунд үйлдвэр, бизнес эрхлэгчдийг дэмжих бодлого явуулж, хамгийн зөв таатай орчныг бүрдүүлэхийг зорьсон юм. Би энэ салбарын зовлон жаргалыг өөрийн биеэр туулсан болохоор хууль тогтоомжийн дарамт ямар их байдгийг мэднэ. Үйлдвэрлэл эрхлэгчдэд дарамтгүй, бизнес эрхлэгчдэд таатай нөхцөлийг бий болгох хэрэгтэй. Төр бол ард түмнийх байх ёстой, хууль тогтоомж нь ард түмнээ дэмжсэн байх ёстой гэдгийг өөрийн биеэр, туршлагаараа мэдэрсэн учраас хууль тогтоох байгууллагад орж өөрийн гэсэн үзэл бодлоо хэрэгжүүлэхийг зорьж байна.

Түүнчлэн зарим сонгогчид "таныг алт "ухаад” баяжсан гэх мэтээр ярьдаг, үүнд ямар тайлбар өгөх вэ” хэмээн асууж байв. Харин нэр дэвшигч Ц.Гарамжав уул уурхайн салбарт баялаг олборлоно гэдэг бол шинжлэх ухаан гэдгийг хэлээд энэ бол манай улсын эдийн засгийн гол хөшүүрэг гэдгийг ч мөн дурьдсан юм. Гэхдээ зөвхөн зөв зохион байгуулалт, хууль эрх зүйн таатай нөхцөлийн хүрээнд уул уурхайн баялгаа ашиглах ёстой гэлээ. Тодруулбал тэрбээр  "Уул уурхайн салбар улс орон бүрт хөгждөг. Өнөөдөр дэлхий дээр уул уурхайн салбар нь хөгжөөгүй нэг ч орон байхгүй. Хүн төрөлхтөн бий болсон цагаасаа л хүрэл зэвсгийн үед, төмөр зэвсгийн үед ч ашигт малтмалаа ашиглаж байсан. Манай улс 1990-ээд оны үед эдийн засгийн хүнд байдалд орохдоо баялгаа ашиглаж ард иргэдээ хүнд байдлаас гаргая гэж "Нүүрс”, "Зэс”, "Алт” хөтөлбөрүүдийг баталж байсан. Уул уурхайн салбарт ажилгүй болсон, институт нь задарсан хэдэн мянган хүмүүс өөрийн мэргэжлийн дагуу уул уурхайн үйлдвэрлэл, ашиглалт, судалгаа шинжилгээний олон ажлууд хийсэн.  Үүний дагуу бид нар Төв аймгийн Заамар суманд алтны үйлдвэр байгуулсан. Энэ үйлдвэрээ бид амжилттай ажиллуулж чадсан.

Уул уурхайг "ухна” гэж ярьдаггүй. Ашиглана, олборлоно гэж ярьдаг юм. Шинжлэх ухааны нэр томьёог маш зөвөөр хэрэглэх ёстой. Уул уурхайн шинжлэх ухаан бол дэлхийн хэмжээнд маш том шинжлэх ухаан. Гэхдээ хууль журамгүй замбараагүй олборлох юм биш. Эх нутгаа хамгаалах ёстой, хайрлах ёстой. Нөгөө талдаа олборлолтыг мэргэжлийн үүднээс зөв хийх ёстой. Бодлоготой, стратеги төлөвлөлттэй байх ёстой. Өөрөөр хэлбэл Монгол Улсад өнөөдөр нүүрс хэрэгтэй байна уу эсвэл алт, зэс хэрэгтэй байна уу  гэдгийг төлөвлөж байж хэрэгжүүлэх ёстой юм.

Жишээ нь Эрдэнэт үйлдвэрийг 40 жилийн өмнө байгуулсан. Манай улсын нийт төсвийн 60 хувийг бүрдүүлж байгаа том үйлдвэр. Үнэхээр ач холбогдлоо өгч байгаа. Эрдэнэтийг "ухаж, сүйтгэж” байна гэж ярих уу эсвэл ард түмнээ тэжээж байна гэж ярих уу. Ер нь юм ярихдаа ухаантай ярих ёстой” гэв.