Дэлхийд хэмжээгээрээ гуравт бичигддэг уул уурхай олборлолтын Rio Tinto компани Монгол дахь алт-зэсийн орд газрынхаа 700 сая долларын татвар төлөөгүй хэрэгт буруутгагдаж байна.

CA-NEWS (MNG) – Монголын Сангийн сайд асан Сангажавын Баярцогттой холбоотой явагдаж буй мөрдлөг шалгалтын хүрээнд швейцарийн банкууд дахь 1,85 сая долларыг хураахыг Швейцарийн Дээд шүүх дэмжжээ. С.Баярцогт нь австрали-британийн уул уурхайн Rio Tinto корпорацийн маргаантай байсан төслийг урагшлуулахад "замыг нь цэвэрлэж” тусалсан тухай Reuters мэдээлсэн байна.

Сангажавын Баярцогт 2008-2013 онд Монголын Сангийн сайдаар ажиллаж байсан.

Швейцарийн ерөнхий прокурорын газар (The Swiss Office of the Attorney General - OAG) мөн эрүүгийн хэрэг мөрдөн шалгах явцад хураагдсан дансуудын нэгээр дамжин 10 сая доллар Монголын экс Сангийн сайд руу шилжсэн болохыг баталсан байна.

Монголын Авлигатай тэмцэх газар 2009 онд С.Баярцогт Rio Tinto концернтэй гарын үсэг зуралцсан хөрөнгө оруулалтын баримт бичгийг судалж байгаа аж.

Reuters агентлагийн мэдээлснээр, Швейцарийн Дээд шүүхийн тогтоолд хувь хүн болон компанийн нэр дурдагдаагүй бөгөөд харин шүүхийн баримт бичгүүд дээр Монголын экс-сайд болон Rio Tinto компани мөрдөн шалгаж буй хэргийн оролцогчид болохыг нарийвчлан дурджээ.

Шүүхийн баримт бичгүүд Rio Tinto-гийн уурхайнуудыг хамарч байгаа бөгөөд тэднийг өргөжүүлэхэд одоогоор 5,3 тэрбум долларын хөрөнгө оруулалт хийгдээд байгаа тухай тэнд тэмдэглэсэн байна.

Сайд асантай холбоотой нэлээн хэдэн хэргийг мөрдөн шалгаж буйгаа Монголын АТГ-ын төлөөлөгч Reuters агентлагт мэдээлсэн хэдий ч тодорхой зүйл цохон дурдаагүй байна. "С.Баярцогт Сангийн сайд байхдаа Монгол улсад ашиггүй гэрээнд гарын үсэг зурсан байж болох шинжүүд илэрч байна” хэмээн Швейцарийн засгийн газрын тогтоолд дурджээ.

Дашрамд дурдахад, 2008 онд Монголын Сангийн сайд асан Сангажавын Баярцогт Швейцарид BVI фирмд Legend Plus Capital Ltd гэх банкны данс бүртгүүлж байжээ.  

Энэ байгууллага С.Баярцогтыг засгийн газарт ажиллаж байсан 2008-2012 онд үйл ажиллагаа явуулж байсан бөгөөд уг фирм бизнесийн хамтрагч найз нөхдийнх нь мөнгөн дээр тулгуурлаж байсан тухай экс сайд хожим нь сэтгүүлчдэд ярьж байсан билээ. Тэрээр үүнийгээ өөрийн "алдаа” байсан гэж хүлээн зөвшөөрөөд, Сангийн сайдаас огцрох өргөдлөө өгч байсан юм.

Жич: Turquoise Hill – Канадын "Тёркиз Хил Ресорс” компани бол Rio Tinto-гийн охин компани бөгөөд Монголын Оюутолгой ордын хувьцааны 66%-ийг эзэмшдэг.

Rio Tinto Group – Дэлхийд хэмжээгээрээ гуравт ордог, үндэстэн дамнасан уул уурхайн компани. Rio Tinto Limited, Rio Tinto plc. гэсэн хоёр компаниас бүрддэг. Уг компани Монголын Оюутолгой зэсийн орд газар болон Узбекистан, Казахстанд геологийн ажлууд явуулж байна.

Оюутолгой бол зэсийн томоохон орд газрууд дотор дэлхийд гуравт, алтны нөөцөөрөө зургаад ордог. Боловсруулалт нь нээлттэй /карьер/, газар доор /уурхай/ хэлбэрээр явагдаж байна. 2001 онд нээгдсэн энэхүү орд газар Монголын нийслэл Улаанбаатар хотоос 550 км зайтай, Говьд оршдог.

Turquoise Hill Resources (өмнө нь Ivanhoe Mines) болон Rio Tinto компаниуд 2009 онд Монголын засгийн газартай хэлцэл хийн, удаан хугацаанд хамтран ажиллах, хөрөнгө оруулах гэрээнд гарын үсэг зурсан юм.

Д.Мигаа

Эх сурвалж: Breakingnews.mn

https://ca-news.org/news:1437912